ჩრდილოეთ კორეის ლიდერმა, კიმ ჩენ ინმა ათობით საჯარო მოხელისა და პარტიული ლიდერის სიკვდილით დასჯის ბრძანება გასცა, იმის გამო, რომ მათ წყალდიდობით გამოწვეულ ზარალს ვერ გაუმკლავდნენ. ინფორმაციას მედია სამხრეთკორეულ Chosun TV-ზე დაყრდნობით ავრცელებს.
ტელეარხის ცნობით, დახვრეტილია 20-30 ადამიანი. მათ ბრალად ედებოდათ ის, რომ ვერ მოახერხეს მოქალაქეების დაღუპვის და ინფრასტრუქტურისთვის მიყენებული ზარალის პრევენცია.
ცნობისთვის, ჩრდილოეთ კორეაში წყალდიდობების სერია ივლისში, ძლიერი წვიმის გამო დაფიქსირდა. დაზიანდა გზები, დაიტბორა სამეურნეო მიწები და 4 ათასზე მეტი საცხოვრებელი სახლი. სამხრეთკორეული მედია 1500 გარდაცვლილის შესახებ წერდა, თუმცა კიმ ჩენ ინმა ამ ინფორმაციას სიცრუე უწოდა.
